News
By Sally | 11 November, 2023
Candidates of PDP, APC, LP for Bayelsa Governorship elections
16 candidates and political parties dey contest di governorship election for Bayelsa State on Saturday 11 November 2023.
Di State Governor, Sen Douye Diri of di Peoples Democratic Party PDP dey seek re-election and go face 15 oda candidates including Timipre Sylva of di All Progressives Congress APC and Udengs Eradiri of Labour Party wey be youth leader from di State.
Di 16 candidates and dia political parties wey dey participate for di election according to di Independent National Electoral Commission INEC include:
Accord - Idikio Warmate Jones
AA - Bufumoh Akpoebi Alex
End of Recommended articles
ADC - Kalango Stanley Davies
ADP - Oguara Nengimonyo
APC - Timipre Sylva
APGA - Subiri Waribodei Joseph
APM - Oshariken Saturday
APP - Ogege Kemelayefa Mercy
BP - Ben Victor Magbodo
LP - Eradiri Udengmobofa
NNPP - Azebi Bestman Ayabeke
NRM - Micah Akeems
PDP - Diri Douye
PRP - Ozato Erepadei Erepadei
SDP - Osuluku Binalayefa
ZLP - Simeon Imomotimi Karioku
Profile of di top candidates for Bayelsa election
64 year old Sen Douye Diri of di Peoples Democratic Party PDP na di Governor of Bayelsa State wey dey seek a second term in office.
E from Sampou for Kolokuma/Opokuma LGA of Bayelsa State. E bin ne di Senator representing Bayelsa Central Senatorial district from 2019 - 2020 before e contest ti be Governor.
On 13 February 2020, Supreme Court of Nigeria invalidate di results of di 2019 Bayelsa State gubernatorial elections after dem disqualify Degi-Eremineyo, di running mate of di actual winner of di election, David Lyon, say e submit forged certificates to INEC.
Di court rule say di disqualification of Degi-Eremienyo infect di joint ticket wey im and Lyon take run di election and so order INEC to issue a fresh certificat of rerun to di candidate of di party with di next highest votes and with di required spread of votes for di results of di election, wey be di PDP.
Na so Sen Douye Diri take become Governor of Bayelsa State on 14 February, 2020.
59 year old Timipre Sylva of di All Progressives Congress (APC) na di immediate past Minister of State for Petroleum and e dey also seek re-election as Governor of Bayelsa State.
Dis na as e bin don be Governor of di State from 27 May 2008 to 27 January 2012 under di Peoples Democratic Party PDP.
Na Supreme Court end im tenure as Governor end in 27 January 2012 as e rule say e and four oda Governors don stay pass di four years wey dem suppose stay as di Nigerian Constitution tok.
Sake of dis, wen e get di ticket of di APC to run as governorship candidate, one Demesuoyefa Kolomo ask one High Court to disqualify Sylva as e no get ‘locus standi’ ti contest as Governor.
On 9 October 2023, Justice Donatus Okorowo hold say becos dem don swear-in Sylva twice and e don rule for five years as Governor, e go breach di 1999 constitution as e go spend more than eight years in office if e dey allowed to contest in di election and eventually win.
Sake of dis ruling, INEC comot Sylva name from di list of candidates but Sykva challenge di decision of di High Court on appeal and di three- member panel of justices restore Sylva as a candidate.
Dem hold say Kolomo wey bin bring di case no partake for di primary wey bring in Sylva as di governorship candidate and so e no get grounds to do so.
47 year old Udengs Eradiri na di candidate of Labour Party from Agudama-Ekpetiama community of Yenagoa LGA.
E be youth leader for Ijaw Youth Council (IYC) and former Commissioner for youth development and environment for Bayelsa State for 2018.
Eradiri don also be special adviser on youths and sports for di Niger Delta Development Commission (NDDC).
E bin don try to contest for di Kolokuma/ Opokuma/Yenagoa federal constituency seat for House of Representatives under di PDP for 2019.
Ogege Kemelayefa Mercy na one of di youngest candidates for di guber elections
One of the two women wey dey contest di governorship election for Bayelsa State na 35 year old Ogege Kemelayefa Marcy from Eriama and Angalabiri community of Sagbama, Sagbama LGA of Bayelsa State. She dey contest under Action Peoples Party APP.
She be one of di candidates wey follow di di Govenor debate wey hold for di State.
Ogege bin don contest for Sagbama constituency one seat for Bayesla State House of Assembly for 2022 before she dey come contest for Governor.
42 year old Oguara Nengimonyo na di oda woman wey dey contest di Bayelsa State gubernatorial election under Action Democratic Alliance ADP party.
Extra national commissioner, eight RECs for Bayelsa election.
As part of preparation for di election, di Independent National Electoral Commission (Inec) deploy an additional National Commissioner and eight Resident Electoral Commissioners to assist in di conduct of Saturday Governorship election for Bayelsa State.
Chairman of Inec, Prof. Mahmood Yakubu say dis na some of di measures dem dey take for improved electoral outcomes.
Prof Yamuna add say over a million Permanent Voter Cards dey collected by registered voters for di State as dem dey use di national register of voters wey dem publish on 11 January 2023 wey dem bin use for di general election, as one million, fifty six thousand, eight hundred and sixty-two voters dey registered in Bayelsa State.
Di National commissioner wey dey supervise Bayelsa, Rivers and Delta States, madam May Agbamuche-Mbu say two international and 53 local media organisations dey send 282 journalists for di election wit 2,000 domestic and 8 foreign observers.
Meanwhile Inspector General of Police Kayode Egbetokun don declare restriction of movement for three states wey di election go hold from 12:01am to 6pm on 11 November 2023.